Uwes Rede zum Galgenberg/Lütjenholm (TOP 10)

Mien leeve Helmut (Wree)!    – so wull ick anfangn –

Door bist du in dien Element. So kenn ick di vun fröher. Bist ganz de Ole bleeben. Dat freut mi. Kämpfer gegen den übertriebenen Naturschutz! So hem wi uns kennenlehrt und so sind wi eentli doch eenigermaten mitnnanner torechtkomen all de Johre, oder?    

Na mol sehn wi dat hüüt utgeiht.    Dat schull mien Inleitung warn.

(Aber nu is he gor nich dor, dor laat ick dat natürli wech – de Rest passt uk för all de annern, de sick hier angageern – aver bi alles wat ick nu sech, heff ick Helmut Wree naürli ganz vürn in mien Achterkopp):

Dat ick door nu so ganz richti glückli mit bin mit disse Projekt, dat kann ick uk nich segen, dor har man seeker noch een beetere Stee finden kunnt (oder nich alle Böhm op eenmol ernten, sondern Johr um Johr, dat weer geschickter ween).

Aber de Spektokl, de jem nu mukken, de harrn jem man vör 2 Johr mukken schullt, as de CDU dat op de Wech bröcht hett, in de Versammlungen, as se dat hier vörstellt hem und as se frogt hem, wie jem dat sehn und ob jem wat dorgegen harrn. Aber dor sind jem gor nich henlopen. Dat kann ick mi so richti vörstelln. Dor sind jem in jenge Sessel seeten bleeben: Naturschutz?…. Juliane Rumpf? …. Dor kann nix Arges bi ruutkomen! Und denn sind jem tohus bleeben – und nu hem jem dat Malheur.

Domols hem jem schlopen, aber nu passt dat natürli uk veel beeter,

wo jem nich mehr an de Regeerung sind. Am besten noch, de Grönen

dat um de Mors to haun: Dat is doch kloor, dat de dat verbroken hem!

Ornli mit Schiet schmieten, dor blivt bestimmt wat hangen!

Aber dat ward nix, dor haun jem sick sülms mit an de Kopp.

Dat Ganze wor 2009 infädelt – Herlich Marie Todsen-Reese

(ick heff eer vörgüstern beleevt, as se in’t Wattforum mit Inbrunst för dat Life-Limosa-Projekt toon Schutz vun de Uferschnepfe worben hett; de herrliche Marie wie Helmut eer nennt, een sympathische Fru – de weer domols Vörsitzende vun de Umweltutschuss und in de Vörstand vun de Stiftung Naturschutz, dor is se hüüt immer noch, und Juliane Rumpf weer Umweltministerin, und de Schutzgemeinschaft deutscher Wald hett tostimmt, dor hem de Grönen erstmol gornix mit to doon! Dat hett de CDU inne Gang bröcht!

Und nu, wo de Böme all op de Siet legen, wöllt jem de wedder op de Stumpen kleben? In dat Schrieben vun de nordfriesische Vereen klingt dat meist so, dat se dat vörhemm, dormit dat nich so lang duert, bit se wedder de 300 Tunnen CO2 ut de Luft holen. Dor hem se allerdings domols in de Schol nich richti oppasst, dat geiht nämli nich – de wassen gor nich wedder an!

Und deswegen kann man dat Projekt uk nu to Ende bringen – dat geiht uk gor nich mehr anners, wenn man nich in gewaltige Regress rinlopen will.

Dat jem de EU-Gelder för de Naturschutz natürli veel beeter in de Landwirtschaft bruuken kunnen, dat kann ik mi vörstellen, denn dat beeten, wat jem dor kriegen, dat is mi klor, dat langt vörn und achtern nich.

Aber dat mit de Grönen und de Naturschutz een bipulen, dat fallt jem op de eegenen fööt. So veel Scheinheiligkeit kann sick nich dörsetten.

Dor war di wiss um.

Und denn kummt uk noch Gudrun Fuchsuut Tating, de niee Fru Vörsitter vun de nordfriesische Vereen, und will dor noch een dropsetten: Völkerrechtswidrig! „Die Pionierarbeit vieler heimatverbundener Menschen wird leichtfertig zunichte gemacht!“    

Dor foot ick mi doch an de Kopp!  

Ich bin ja nur Halbfriese – Vadder Hessen – Modder geb. Petersen –

dat hett bi mi wohl watt döreenanner bröcht, deswegen kann ick dat sach nich begriepen – Ick frooch mi:

Hett se dat sülms schreben oder hett man eer dat dikteert?

Mi dünkt, dor fehlt bloß noch de Satz: „Das Projekt ist eine Störung

der nordfriesischen Totenruhe!“ Mensch, dat Leben geiht doch wieder!

Süht se dat wirkli so oder wull se sik dormit mal ’n beeten in de Szene bekannt moken und ’n beeten inschmeicheln?

Ick nimm mal an to eer Gunsten, dat dat dat letzte is!!

Helmut Wree hett mi denn letzte Wuch noch anropen –  hett wohl irgendwo hört, dat ick watt mit em vörhar – He hett mi seggt,

dat dat nich sien Absicht ween is, dat de Grönen de Schuld kriegen.

Aber dat he dor nu so richti gifti öber ween is, dat disse Nebeneffekt intreten is, dat kunn ick dor bi em uk nich so richti ruut hörn.

Und Helmut Wree is’n Fuchs!

Also – mientwegen muck en Anhörung, dat dor noch mehr Licht rinkummt in de Soock, uck wenn dat nix mehr ännern deit –

aver Fru Todsen-Reese und Juliane Rumpf shöt unbedingt dorbi ween,

de weeten genau wie dat lopen is und de sind uck mitverantwortlich.

Dat letzte is unse Andrag.